ព័ត៌មាន

នារសៀលថ្ងៃទី ១៨ ខែ ធ្នូ ឆ្នាំ ២០២៤ នៅសាលប្រជុំធំនៃសាលាខណ្ឌជ្រោយចង្វារ, មជ្ឈមណ្ឌលបណ្តុះធុរកិច្ចថ្មី “តេជោ” បានរៀបចំវគ្គចាប់យកឌីជីថលស្តីពី “បរិវត្តកម្មឌីជីថលសម្រាប់សេដ្ឋកិច្ចក្រៅប្រព័ន្ធ” ជំនាន់ទី ១ នៃកម្មវិធីបរិវត្តកម្មឌីជីថលសហគ្រាស-Enterprises Go Digital (EGD) ជូនដល់ក្រុមគោលដៅនៃអាជីវកម្មលក់រាយដែលស្ថិតនៅក្នុងមូលដ្ឋានខណ្ឌជ្រោយចង្វារ ដោយមានអ្នកចូលរួមសរុបប្រមាណ ១០២ នាក់ ។

មជ្ឈមណ្ឌលបណ្តុះធុរកិច្ចថ្មី “តេជោ” ដែលជាស្ថាប័នអនុវត្តកម្មវិធីបរិវត្តកម្មឌីជីថលសហគ្រាស សូមថ្លែងអំណរគុណយ៉ាងជ្រាលជ្រៅដល់ថ្នាក់ដឹកនាំ និង មន្ត្រីជំនាញ នៃរដ្ឋបាលខណ្ឌជ្រោយចង្វារ អ្នកបង្ហាត់បង្ហាញ ភ្ញៀវកិត្តិយស និង អាជីករទាំងអស់ដែលបានសហការ និង ចូលរួមកម្មវិធីប្រកបដោយភាពរលូន។

វគ្គចាប់យកឌីជីថលនេះត្រូវបានរៀបចំឡើងដោយកិច្ចសហការរវាង មជ្ឈមណ្ឌលបណ្ដុះធុរកិច្ចថ្មី "តេជោ" និងរដ្ឋបាលខណ្ឌជ្រោយចង្វារ ដោយមានការគាំទ្រថវិកាពី មូលនិធិអភិវឌ្ឍន៍ជំនាញ ក្នុងគោលបំណងពង្រឹងសមត្ថភាពឌីជីថលរបស់សហគ្រាសដើម្បីផ្លាស់ប្តូរបៀបរបបប្រកបអាជីវកម្មក្នុងយុគសម័យឌីជីថល ព្រមទាំងជំរុញការចាប់យកការប្រើប្រាស់បច្ចេកវិទ្យាឌីជីថលនៅក្នុងប្រតិបត្តិការអាជីវកម្មដើម្បីបង្កើនផលិតភាព និង ប្រាក់ចំណូលដល់អ្នកសេដ្ឋកិច្ចក្រៅប្រព័ន្ធ។