កម្មវិធីបរិវត្តកម្មឌីជីថលសហគ្រាស គឺជាក្របខ័ណ្ឌរួមមួយសម្រាប់ជួយសម្រួលដល់ការរៀបចំ និង អនុវត្តគម្រោងនានាពាក់ព័ន្ធនឹងបរិវត្តកម្មឌីជីថលសហគ្រាស ដើម្បីជំរុញការអភិវឌ្ឍវិស័យឌីជីថលនៅកម្ពុជា ដែលជាចន្ទល់កំណើនសេដ្ឋកិច្ចថ្មី ព្រមទាំងជាចលករគាំទ្រ និង លើកស្ទួយវិស័យទ្រទ្រង់សំខាន់ៗនៃប្រព័ន្ធសេដ្ឋកិច្ចជាតិក្នុងរយៈពេលមធ្យម និង វែង។

រាជរដ្ឋាភិបាលត្រូវ លើកកម្ពស់ប្រព័ន្ធអេកូឡូស៊ីធុរកិច្ចឌីជីថល និង បង្កើនល្បឿនបរិវត្តកម្មឌីជីថលសហគ្រាសដើម្បីជំរុញការចាប់យកឌីជីថលរបស់សហគ្រាសគ្រប់កម្រិត​ និង គ្រប់វិស័យក្នុងន័យពង្រីកទីផ្សារ, ពង្រឹងប្រសិទ្ធភាពប្រតិបត្តិការ, ធានាបាននូវចីរភាពនៃអាជីវកម្ម, បង្កើនផលិតភាពនិងប្រសិទ្ធភាព,​ លើកកម្ពស់ភាពប្រកួតប្រជែង និង ជំរុញការចូលរួមរបស់វិស័យឯកជនតាមខ្សែច្រវាក់ឌីជីថលតំបន់ និង សកល។